自製玩具畀小朋友玩原來係咁簡單？
有冇發覺屋企有好多玩具，但係小朋友只係玩左一陣就唔玩？有時啲玩具千篇一律，買買埋埋就一大堆，如果想有啲心思同創意，不如試下同小朋友一齊DIY啲玩具出嚟，又可以加強親子關係，仲可以喺遊戲中訓練小朋友嘅溝通能力呢！
公仔換衫遊戲
你可以去一啲網站下載公仔同埋衣服嘅紙樣，假如想挑戰難度，仲可以自己親手畫一個獨一無二嘅公仔套裝出嚟添。有了公仔同埋衣服嘅紙樣之後，就可以請小朋友幫佢哋塗上顏色，然後將公仔及衫剪出來，再用漿糊筆貼在磁石上，並把彩紙及膠帶貼在咭紙上作為背景。然後，可以請小朋友自由替公仔著衫，再請佢用完整句子講出包括顏色及形容詞的三詞句（如 “女仔著左紅色短袖衫”），以訓練表達能力，調番轉，亦可請小朋友跟從家長嘅指令幫公仔著上不同顏色及長短的衣服，以訓練理解能力。
餵動物遊戲
首先用個紙袋剪成動物咀巴嘅形狀，再喺外面貼上動物嘅圖畫，咁就完成呢個餵動物遊戲了！係咪好簡單呢。然後喺枱面放上唔同食物嘅圖畫或玩具，再請小朋友按指令餵動物，或請小朋友一邊講出完整句子（如 "小狗吃香腸" 等）一邊餵動物。
DIY自製印仔
文具店內會有好多彩麗皮公仔貼（普通文具店有售，有不同款式如海洋生物、水果、交通工具等），買一大包番嚟將彩麗皮貼喺樽蓋上（如圖），建議你用較高嘅蓋子（如圖中黃色那個，會較好拿），再買個印台沾點墨，就可以印喺紙上，印出嚟嘅效果仲幾唔錯！當小朋友一邊印公仔時，仲可以鼓勵佢創作埋簡單故事，可以訓練其創意及表達能力。
Carley (專頁：言語治療師媽媽Miss Carley)
資深言語治療師，曾於各大私人機構及國際學校任職言語治療師，為超過二十間主流中小學提供言語治療服務，現任專業幼兒教育協會課程講師，並為各大育兒雜誌如“尖子教育”、“B Magazine”及網上育兒平台“廿四孝父母”擔任顧問及專欄作家。
最後編輯日期：2019年8月20日
